વર્ષો જવાને જોઈએ ત્યાં ક્ષણમાં જઈ ચડ્યો,
આશ્ર્વર્ય વચ્ચે એમના આંગણામાં જઈ ચડ્યો !
પૂછો નહીં કે આજ તો ક્યાં નીકળી ગયો,
કાજળને સ્પર્શવા જતા કામણમાં જઈ ચડ્યો !
આંધારમુક્ત થઈ ના શક્યો રોશની મહીં,
આંખોમાં આંખ નાખી તો પાંપણમાં જઈ ચડ્યો !
મનફાવે તેમ આભમાં ફંગોળતી રહી,
હું ક્યાંય નહિ ને ગેબની ગોફણમાં જઈ ચડ્યો !
કૈં ચાંદની જ એવી હતી, ભાન ના રહ્યું,
જાવું હતું સમુદ્ર ભણી, રણમાં જઈ ચડ્યો !
ન્હોતી ખબર જવાય નહીં એમ સ્વર્ગમાં,
પહેર્યુ હતું હું એ જ પહેરણમાં જઈ ચડ્યો !
'ઘાયલ' ગયો'તો કેમ સુરાલયમાં શું કહું ?
ખૂબ જ હતો હું આજ વિમાસણમાં જઈ ચડ્યો.
- 'ઘાયલ' અમૃતલાલ
No comments:
Post a Comment