લાજના ભાવથી નમી તે ગઝલ, જે પ્રથમ દ્રષ્ટિએ ગમી તે ગઝલ. - 'ઘાયલ' અમૃતલાલ

અણગમાને અતિક્રમી તે ગઝલ,
ને પ્રણયમાં પરિણમી તે ગઝલ.

લાજના ભાવથી નમી તે ગઝલ,
જે પ્રથમ દ્રષ્ટિએ ગમી તે ગઝલ.

આંખમાં આંજી સ્નેહનો સુરમો,
રાતભર સોગઠે રમી તે ગઝલ.

શેરીએ શેરીમાં અજંપાની -
આંધળી ભીંત થઈ ભમી તે ગઝલ.

ચોતરફ મૌન મૌનની વચ્ચે,
એક તલસાટ કાયમી તે ગઝલ.

તેજ રૂપે કદી તિમિર રૂપે,
મેઘલી મીટથી ઝમી તે ગઝલ.

નિત સમય જેમ ઊગતી જ રહી,
અસ્તમાં પણ ન આથમી તે ગઝલ.

દ્રષ્ટિ મળતાં જ પાંપણો મધ્યે,
ઊગે સંબંધ રેશમી તે ગઝલ.

જિંદગીની કે જાંફિશાનીની,
હોય જે વાટ ઝોખમી તે ગઝલ.

એ તો છે ચીજ સર્વ મોસમની,
નિત્ય લાગે જે મોસમી તે ગઝલ.

એમની એ જ છે કસોટી ખરી,
દિલને લાગે જે લાજમી તે ગઝલ.

માલમીને ય એ તો પાર કરે,
માલમીની ય માલમી તે ગઝલ.

લીટી એકાદ નિરખી ' ઘાયલ '
હલબલી જાય આદમી તે ગઝલ.

- 'ઘાયલ' અમૃતલાલ