જિંદગી ના મળી મન મુજબની,ત્રાસ છે, યાતના છે, સિતમ છે. - શૂન્ય પાલનપુરી

જિંદગી ના મળી મન મુજબની,

ત્રાસ છે, યાતના છે, સિતમ છે.

તે છતાં હાય ! કહેવું પડે છે,

'દેણ ઈશ્વરની કેવી પરમ છે !'

એબ પર થઈને મુસ્તાક ફરવું,

એને શોભા ગણે તે અધમ છે;

નિત પ્રદર્શિત કરે છે કલંકો,

ચાંદ પણ કેટલો બેશરમ છે !

જો ના પામી શકાયે સમંદર,

તો મરણને જ માનું હું બહેતર !

એક ખાબોચીયે ડુબવામાં,

ગર્વ લે મરજીવો એ શરમ છે.

પ્રેમ-દર્દીનો ઉપચાર મૂકો,

સૌ ઇલાજોની એને ખબર છે,

રોગ થઈ જાય જેનો પુરાણો,

શું ભલા એ તબીબોથી કમ છે ?

પ્યારાને મારી નિર્બળ ન માનો,

હાથ લાગ્યું છે ઝરણું સુરાનું;

જામ લઈ લો, હટાવો સુરાહી,

આપને મસ્ત આંખોના સમ છે.

એક દોટે મળે છે ન મંઝિલ,

લાખ કરવા પડે છે વિસામા !

દુઃખ નથી શૂન્ય લાંબી સફરનું;

અશ્વ કમજોર છે એનો ગમ છે.

- શૂન્ય પાલનપુરી