કેમ ભૂલી ગયા ? દટાયો છું, આ ઇમારતનો હું ય પાયો છું. - 'ઘાયલ' અમૃતલાલ

કેમ ભૂલી ગયા ? દટાયો છું,
આ ઇમારતનો હું ય પાયો છું.

હું હજી પૂર્ણ ક્યાં કળાયો છું?
અડધો પડધો જ ઓળખાયો છું.

વિસ્તર્યા વિણ બધેય છાયો છું,
હું અજબ રીતથી ઘવાયો છું !

આમ તો એક બિંદુ છે કિંતુ,
સપ્ત સિંધુથી સંકળાયો છું.

સુર્યની જેમ સળગ્યો છું વર્ષો,
ચંદ્રની જેમ ચોડવાયો છું !

વઢ નથી વિપ્ર, આ જનોઈનો,
આમ હું આડેધડ કપાયો છું.

રામ જાણે શું કામ હું જ મને,
સર્પની જેમ વીંટળાયો છુ !

એ જ છે પ્રશ્ર્ન : કોણ કોનું છે ?
હું ય મારો નથી, પરાયો છું !

સાચું પૂછો તો સત્યના પંથે,
ખોટી વાતોથી દોરવાયો છું !

ઊંચકે કોણ પંથ ભૂલ્યાને ?
આપમેળે જ ઉંચકાયો છું.

મીંડું સરવાળે છું છતાં ' ઘાયલ '
શૂન્ય કરતાં તો હું સવાયો છું.

- 'ઘાયલ' અમૃતલાલ